Herson işğali vaqtında Herson telekanalınıñ yerli filialından hırsızlanğan techizatlarnen işğal etilgen Qırımda "Tavria" Rusiye teleradiokompaniyasınıñ studiyasını açtılar. Bunı Milliy tirenüv merkezi bildire (MTM).
"2022 senesi rusiyeliler Herson şeerinden qaçıp, "Suspilne. Herson"nıñtechizatlarını alıp kettiler ve "Tavria" sahte telekanalını teşkil ettiler. Şimdi bu propaganda yayınlayıcısı Aqmescitte studiyanı açtı", — dep aytıla haberde.
Milliy tirenüv Merkezinde qayd etkenlerine köre, yarımadada Ukrayina cenübiniñ işğal etilgen topraqlarında yayınlaycaq telekanalnıñ studiyasınıñ açılmasınıñ sebebi kadrlar yoqluğı olğan.
"Vaqtınca işğal etilgen Hersonda Kreml stsenariyleriniñ icracılarını tapıp olamadılar. Şunıñ içün studiyanı Qırım musafirhanesine yaqınlaştırdılar, anda gaulâyter (Herson vilâyetiniñ işğal etilgen qısmından) Vladimir Saldo "yaşay". Endi o "ekran yıldızı", — dep ayttılar Merkezde.
Ukrayina ordusı Herson ve Herson vilâyetiniñ bir qısmını 2022 senesi boş ayda azat etti. Herson vilâyetiniñ sol yalı qısmı Rusiye işğali altında qalmaqta.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
