Qırımdaki Rusiye mahkemesi tarafından 8,5 yılğa azatlıqtan marum etilgen Ukrayina Arbiy-deñiz quvetleriniñ yedekteki zabiti Oleksiy Kıselevniñ sağlıq problemleri başlanğan, onı sıq-sıq ceza izolâtorına yollay ekenler. Bu aqta "Suspilne" onıñ oğlu Artemge atıf etip haber ete.
Onıñ aytqanına köre, babası "ağır sıñırlavlarğa oğratılğan gruppada" buluna
"Meselâ, er eki-üç saatta mabüs nevbet bölüginde qayd etilmege ya da kamera ögüne çıqmağa mecbur. Memuriyet mabüske qoşma diqqat ayırmağa istese, onı teşkermek içün gece de kötere bileler", — dep qayd etti Artem Kisılev.
O, şunı da ayttı ki, Oleksiy diger mabüslernen qonuşa ve olarnıñ siyasiy baqışlarını deñiştirmege tırışa ve buña "bir şeynen" irişe.
"Babam öyle de diger mabüslerniñ yapqan işlerini red ete. Sağlığı pek yaramay. Murmanskta da küneş yoq, şunıñ içün kemik ve buğum problemleri başlandı. İş yapmaqtan vazgeçkeni içün babası bir ay devamında ceza izolâtorında buluna, anda bütün kün tura", — dep qoştı mahküm etilgen zabitniñ oğlu.
2022 senesi oraq ayınıñ 30-nda belli oldı ki, oraq ayınıñ 22-nde işğal etilgen Geniçeskte Rusiye quvetçileri Ukrayina Arbiy-deñiz quvetleriniñ "Slavutiç" istihbarat gemisiniñ sabıq komandanı Oleksiy Kısılevni yaqaladılar. Bundan soñ, arbiyniñ aytqanına köre, Rusiye quvetçileri onı işkencege oğrattı, soñra Qırımğa alıp kettiler ve SİZO-ğa yerleştirdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
