Ukrayina mayısnıñ 12-nde Rusiye-Ukrayina cenkinde ateş toqtatıluvını bekley, dep bildirdi memleketniñ prezidenti Volodımır Zelenskıy.
«Ukrayina bunı çoqtan teklif ete, ortaqlar teklif ete. Bütün dünya bunı ayta. Rusiyeden tam bir cevap bekleymiz. Rusiyeniñ cenkini kene de toqtatmaq kerek olacaq. Ukrayina quvetleri küzgü kibi cevap bermege azır olacaq – er şey adaletli olsun dep. Putin ateşni toqtatmağa razı olmasa, ortaqlarımız Rusiyege qarşı sanktsiyalarnı quvetleştirmege azır», – dedi Zelenskıy ve mayısnıñ 15-nde Türkiyede Rusiye lideri Vladimir Putinnen şahsen muzakere keçirmege azır olğanını tekrarladı.
Mayısnıñ 11-nde ABD prezidenti Donald Trump Ukrayinanı Rusiye prezidenti Vladimir Putinniñ teklif etken Türkiyedeki muzakerelerge «acele» razı olmağa çağırdı ve «Ukrayina Putinnen añlaşma tizeceginden» şübhelengenini bildirdi.
Rusiye prezidenti Vladimir Putin mayısnıñ 15-nde İstanbulda Ukrayinanen «doğrudan-doğru muzakerelerni» ğayrıdan başlatmağa teklif etti, bu aqta o, jurnalistlernen subet vaqtında ayttı. Aynı vaqıtta Ukrayina «istegenler koalitsiyasınıñ» körüşüvi neticesinde ittifaqdaşlarınen beraber mayısnıñ 12-nden başlap şartsız ateşkesni teklif etti, amma Rusiye prezidenti buña cevap bermedi.
ABD prezidenti cumaaqşamı künü Ukrayina prezidenti Volodımır Zelenskıynen telefonda laf etip, Rusiye ve Ukrayina arasında 30 kün devamında şartsız ateşkeske çağırdı. Aks alda, Trump Washington ve ittifaqdaşları qoşma sanktsiyalar kirsetecek, dep tenbiledi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
