Bir qaç on yıl devamında kürd devletini qurmaq maqsadınen Türkiyege qarşı silâlı küreş alıp barğan Kürdistan İşçi Partisi (PKK) dağılğanını ve silâ taşlağanını ilân etti. Bu aqta bazarertesi künü Türkiye, ABD ve AB terrorist dep sayğan gruppağa yaqın olğan Firat haber agentligi haber etti.
Bundan evel ömür boyu apis cezası çekken PKK lideri Abdullah Öcalan teşkilâtnı dağılmağa çağırdı. Onıñ muracaatından soñ firqa Iraq şimalinde toplaşıp, bu qararğa qoltuttı. Derc etilgen beyanatta PKK «tarihiy missiyasını yerine ketirdi», ve artıq kürd meselesi demokratik yollarnen çezile bile.
Türkiyeniñ ükümran firqasınıñ vekili Ömer Çelik bu qararnı «terrordan serbest Türkiyege müim bir adım» dep adlandırdı. Haber etilgenine köre, Ankara PKK qararını bekley edi. Agentlik qayd etkenine köre, Türkiye prezidenti Recep Erdoğan ekseriyeti kürdler yaşağan Türkiyeniñ cenübiy-şarqiy regionlarında telükesizlik temin etilse, anda qoşma sermiya bermege vade etken edi.
Yaqın vaqıtqa qadar Türkiyeniñ uquq qorçalayıcıları ve memurlarına qarşı teraktlar yapqan PKKğa qarşı küreş Türkiyede muhalif faallerni taqip etmek içün bir manaçıq olıp hızmet etti – hususan, yaqında apiske alınğan İstanbul şeer yolbaşçısı Ekrem İmamoğlunıñ da PKKnen bağları bar, dep aytıldı.
Kürdistan İşçi Partisi 1984 senesinden berli Türkiye akimiyetine qarşı silâlı küreş alıp bardı. Türkiye ise qomşu memleketlerde separatistlernen küreşti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
