Qırımtatar Milliy Meclisiniñ reisi Refat Çubarov Qırım sakinlerini 1944 senesi qırımtatar sürgünliginiñ qurbanlarını yarımadada Rusiye akimiyetiniñ tedbirleri ve basqısına baqmadan añmağa çağırdı.
Çubarov bunı mayısnıñ 13-nde Ukrayina krizis media-merkezinde qırımtatar halqı genotsidiniñ 81 yılına bağışlanğan ve Qırımtatar resurs merkezi tarafından teşkil etilgen matbuat konferentsiyasında ayttı.
«Qırımtatar halqı genotsidiniñ qurbanlarını añma tedbirlerini işğalci akimiyet teşkil etken areketler tışından keçirmege rica etem. Er yıl olğanı kibi bu usullar belli: insanlar işğalci akimiyeti ve timsalleri olmağan vaqıtta hatıra yerlerini ziyaret ete – qırımtatar halqı genotsidiniñ qurbanları hatırasına tiklengen abide, hatıra taşları», – dedi o.
Çubarovnıñ qayd etkenine köre, 1944 senesiniñ sürgünligi keçmişte qalmadı – bugün de devam ete ve Rusiye işğali vaziyetinde qırımtatarlarnıñ aqları muntazam sürette bozula. O, bu mevzuğa daima diqqat celp etilmeli, dep qayd etti.
1944 senesi mayısnıñ 18-nde Sovet rejimi Qırımdan Orta Asiyağa bütün qırımtatar halqını sürgün etti. Üç kün içinde 200 biñ qırımtatar mal vagonlarında Vatanından alıp çıqarıldı.
Bu künde qırımtatar halqınıñ Qırımdan sürgün etilüviniñ qurbanları hatırasına matem tedbirleri keçirile.
Ukrayina Yuqarı Radasınıñ qararınen mayısnıñ 18-i qırımtatar halqınıñ genotsid qurbanlarını añma künü olaraq ilân etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
